Salvatore Di Giacomo

 

Pianoforte ‘e notte

 

Nu pianefforte ‘e notte

sona lontanamente,

e ‘a musica se sente

pe ll’ aria suspirà.

 

E’ ll’ una: dorme ‘o vico

ncopp’ a sta nonna nonna

‘e nu mutivo antico

‘e tanto tiempo fa.

 

Dio, quanta stelle ncielo!

Che luna! E c’aria doce!

Quanto na bella voce

vurria sentì cantà!

 

Ma solitario e lento

more ‘o mutivo antico;

se fa cchiù cupo ‘o vico

dint’ a ll’oscurità.

 

Ll’anema mia surtanto

rummane a sta funesta.

Aspetta ancora. E resta,

ncantannose, a penzà.